Sunday, February 28, 2021

මූලික කඳවුර තරණය සඳහා ආම්පන්න ලැයිස්තුව

සුබ දවසක්!

Scan Alpine අපි අද කතා කරන්න බලාපොරොත්තු වන්නේ මූලික කඳවුර තරණය සඳහා වුවමනා වන උපකරණ හා ආම්පන්න පිළිබඳවයි. තවත් බොහොම වැදගත් මාතෘකාවක්.

 


ඔබ දැනටමත් දින කිහිපයක කඳු තරණයක නිරත වුණු අයෙකු නම් හොඳ අවබෝධයක් තියෙනවා ඇති ඔබට වුවමනා වේ යැයි සිතෙන සියල්ලම ඔබට ඔසවා ගෙන යා හැකි ප්‍රමාණයක බැක් පැක් එකක් තුළට එකතු කර ගැනීම කෙතරම් අපහසු ද කියන කාරණය.

 කඳු තරණයක නිරත වෙනවා කියන්නේ අපි අපේ සුව පහසු වට පිටාවෙන් මිදෙනවා කියනවා වගේම අපේ සාමාන්‍යය, එදිනෙදා ජීවිතයේ දී අප විසින් භාවිතා කරන්නට හුරු වී තිබෙන සුඛෝපභෝගී උපකරණ සියල්ලක් ම අපට ගෙන යන්නට ත් හැකියාවක් නෑ.

 

Better to have it and not need it - PMag.com

ඉතිං පළමුවෙන් ම ඔබ කළ යුතු දේ නම් ඔබ විසින් කරන්නට යෙදෙන මේ ගවේෂණයේ ස්වභාවය, අභියෝගයන් වගේ ම ඔබගේ පුද්ගලික අවශ්‍යතා හා සෞඛ්‍යය අවශ්‍යතාවයන් පිළිබඳව ඉතා හොඳ අධ්‍යයනයක් කිරීමයි. ඒ අනුව ඔබට වඩාත් හොඳින් ගමනට වුවමනා කරන ද්‍රව්‍යය පිළිවඳව තීරණයක් ගැනීම කරන්නට පුළුවන්.

අවසාන මොහොතේ දී මෙවන් අත්‍යාවශ්‍යය දේ මිල දී ගැනීම වෙනුවට පෙර හොඳ සූදානමක් සහිතව මේ වෙනුවෙන් යොමුවීමෙන් සිඳු විය හැකි අපහසුතාවයන් බොහොමයක් මඟ හරවා ගත හැක. මේ අනුව ඔබට ගැළපෙන ප්‍රමාණය, වර්ණය, ගුණාත්මක භාවය අනුව ඔබට තෝරා ගැනීම් කරන්නට ඇති තරම් කාලය තිබේ වී.

What backpacking gear have you damaged or destroyed? - Travel Journals.net


ඒ වගේම තවත් කාරණයක් තමයි මෙහි එන ඇතැම් උපකරණ ඔබට කත්මණ්ඩු නුවරින් කුළී පදනම යටතේ ලබා ගැනීමේ හැකියාව පවතිනවා. නිරතුරුව කඳුතරණයේ නොයෙදෙන අයෙකුට මේ විකල්පය වඩාත් ප්‍රායෝගික වේවී.

කත්මණ්ඩු වලදී ඔබට මඳක් පාවිච්චි කළ උපකරණ ඉතාමත් සාධාරණ මිලකට මුලදී ගන්නත් පුළුවන්. නමුත් ජනප්‍රිය සන්නාම නාමයන් අනුකරණය කළ ගුණාත්මක බවින් අඩු ආදේශක ත් ඒ අතර බහුල වෙනවා. ඒ පිළිබඳව ඔබ අනිවාර්‍ය්න්ම ප්‍රවේශම් විය යුතුයි. අන්තර්ජාලයේ විස්තර සෙවීමෙන්, හා මෙම අත්දැකීම ලබා ගත් ඔබේ මිතුරන්ගෙන් අසා දැන ගැනීමෙන් විශ්වාසවන්ත කඩ සාප්පු කිහිපයක නම් ඔබට සොයා ගන්නට පුළුවන් වේවී.

NEPAL TIP # 2 FAKE SHOP of The North Face in Nepal - Youtube 

ඔබ මේ ගවේෂණය සඳහා යම් කිසි සමාගමක සේවය ලබා ගන්නේ නම් ඔවුන් හා මේ මාතෘකාවට අදාළව පැහැදිලි ව සන්නිවේදනය කරන්න. ඔවුන් ඔබට ඉදිරිපත් කළ මිල කතනයේ ඇතැම්විට මේ යම් යම් උපකරණ ඇතුළත් කර තිබෙන්නටත් පුළුවන්.

ඒ වගේම තමයි, ඔබේ ළඟ ම මිතුරෙකු වෘත්තීය කඳු නඟින්නෙක් නම්, මේ ඇතැම් උපකරණ ඔබට ඔහුගෙන් / ඇයගෙන් ණයට ඉල්වා ගන්නත් පුළුවන්. නමුත් මතක තබා ගත යුතු කාරණය නම්, මේ සමහරක් උපකරණ ප්‍රචලිත සන්න්නාම යටතේ පැමිණෙන අතර  ඉතාමත් අධික මිලක් වෙනවා වගේම වෘත්තීමය වශයෙන් ක්‍රීඩාවේ නිරත වන අයෙකු මෙම වත්කම් ඉතාමත් අරපරිස්සමින් හා ආදරකින් පාවිච්චි කරන්නට යෙදෙනවා. ඉතිං ඔබේ මිතුරා යම් කිසි හෙයකින් ඔබ සමඟ ඒ උපකරණ බෙදා ගන්නට අකමැති වුව්හොත් ඔහු සමඟ අමනාප වෙනට එපා.

ඔබේ ගමන සැළසුම් කිරීමේ දී ම මතක ඇතුව වුවමනා කරන උපකරණ හා ඇඳුම් මිල දී ගැනීම සඳහා ප්‍රමාණවත් මුදලක් වෙන් කර තබා ගන්න. මිල අඩු ආදේශක භාවිතා කිරීම මඟින් ඔබගේ සම්පූර්ණ ගවේෂණය ම අසාර්ථක එකක් බවට පත් විය හැක.

Grandmas all around are rolling in their graves - Reddit


ඒ වගේම තමයි, අධික සීතලෙන් යුතු මාසයන් මඟ හැරීම මඟින් ඔබට සාපේක්ෂව යම් මුදලක් ඉතිරි කර ගැනීමටත් අවස්ථාව ලැබෙන්නේ අධික සීතල කාළගුණයකට වුවමනා කරන ඇඳුම් ආයිත්තම් ඉතාමත් මිලෙන් අධික නිසායි.

හොඳයි අපි දැන් අපේ උපකරණ හා ඇඳුම් ලැයිස්තුවට යොමු වෙමු. මේ ලැයිස්තුව සැකසීමේ දී වඩාත් සීතලෙන් යුතු දෙසැම්බර් - පෙබරවාරි මාසයන් අතරතුර සිඳු කරන ගවේෂණය ක් සඳහා අවධානය යොමු කර ඇත.

එමෙන් ම මෙහි සඳහන් වන්නේ ලුක්ලා සිට එවරස්ට් මූලික කඳවුර දක්වා වූ ගමන් මඟෙහි භාවිතය සඳහා සුදුසු ඇඳුම් හා උපකරණ වර්ග හා යෝජනා කරන ප්‍රමාණයන් පමණක් බවත් මතක් කළ යුතුයි.

ඇඳුම් 


සාමාන්‍යයෙන් සීතල කාළ ගුණික තත්වයක් යටතේ සිඳු කරනු ලබන කඳු තරණයන් හී දී ස්ථර කිහිපයකින් ඇඳුම් ඇඳීම සිඳු කරනු ලබනවා. මේ ස්ථරයන් පිළිවෙලින් මූලික ස්ථරය - Base layer, දෙවන ස්ථරය - Insulation layer, බාහිර ස්ථරය - Outer layer ලෙසින් හඳුන්වන්නට පුළුවන්.

Introduction to Layering - Paddy Pallin

සම්පූර්ණ ගමන පුරාවට ම මේ සි‍යළු ස්ථරයන්ගෙන් සැරසී සිටීම අනවශ්‍යය වන අතර, ගමනේ වඩාත් සීතලෙන් යුතු කොටසේ දී ඔබට නිසි අයුරින් සූදානම් විය හැකිය. සීතල කාළගුණයක් සඳහා ඔබින අමුද්‍රව්‍ය වලින් නිමවී තිබීම ඉතාමත් වැදගත්. ඒ වගේම බාහිර ස්ථරය සීතල සුළඟින් හා වැස්සෙන් ඔබව ආරක්ෂා කළ හැකි ඉතාමත් හොඳ ගුණාත්මක බවකින් යුතු වෙනවා.

කඳු තරණ  කළිසම්

එවරස්ට් මූලික කඳවුර තරණයේ මුල් කොටසේ දී ඔබට කොට කළිසමකින් සැරසී ගමන් කිරීම වඩාත් පහසුවක් වේවි. නමුත් එය එකිනෙකාගේ පුද්ගලික පුරුද්දක හා කැමැත්ත මත තීරණය කළ යුතු දෙයක්. කළිසම් තෝරා ගැනීමේ දී කඳු තරණය සඳහා ම නිපද වූ කළිසම් තෝරා ගැනීමට සැළකිළිමත් වන්න. එම නිශ්පාදන බොහෝ විට බරින් අඩු, ඉක්මනින් වියළෙන, ඇසිරීමේ දී අඩු ඉඩක් ලබා ගන්නා, චලනයට පහසු ලෙසින් හා රළු පාවිච්චියට සුදුසු ලෙසින් නිපදවා තිබෙනවා.

එක් දිග කළිසමක් හා කොට කළිසම් දෙකක් පමණ රැගෙන යෑම මෙම ගවේෂණය සඳහා ප්‍රමාණවත් වේවී.

කඳු තරණ  ටී ෂර්ට්

ඉක්මනින් වියැළෙන, දහඩිය වාෂ්ප වීමට ඉඩ සළසන අමු ද්‍රව්‍යයකින් සෑඳූ නිශ්පාදනයන් කෙරෙහි අවධානය යොමු කරන්න. අත් දිග හා අත් කොට ලෙසින් ඔබට තෝරා ගැනීම් කළ හැකි අතර සම්පූර්ණ ගමන සඳහා ටී ෂර්ට් 5ක් පමණ ප්‍රමාණවත් වේවී. ඔබට මේ සියළු ඇඳුම් සෝදමින්, වියැළීම සඳහා දිවා කාලයේ දී ඔබේ බැක් පැක් එකෙහි පසු පස එල්වා ගෙන ගමන් කළ හැක.

Hiking-Tshirt-for-men - Blog, camino adventures

යට  ඇඳුම්

ඉක්මනින් වියැළෙන, දහඩිය වාෂ්ප වීමට ඉඩ සළසන අමු ද්‍රව්‍යයකින් සෑඳූ නිශ්පාදනයන් කෙරෙහි අවධානය යොමු කරන්න. සම්පූර්ණ ගමන සඳහා ටී ෂර්ට් 5ක් පමණ ප්‍රමාණවත් වේවී.

 ඒ වගේම ශරීරයට අපහසුවක් නොදැනෙන අමු ද්‍රව්‍යයකින්, හැඩයකින් හා නිමාවකින්, තෝරා ගන්න. දිනකට පැය කිහිපයක් එක දිගට ඇඳගෙන දීර්ඝ පා ගමන් කිරීමට සිඳු වීම නිසා කෙළින් ම ශරීරය හා ඝර්ෂණයේ යෙදෙන මෙම ඇඳුම් කාණ්ඩය පිළිබඳව අනිවාර්‍යන්ම නිසි අවධානය යොමු කළ යුතු වෙනවා. උදාහරණයක් ලෙසින් කාන්තා උඩුකය ආවරණය වන යට ඇඳුම වල පැවතිය හැකි ලෝහ කොටස්, අධික තද බවින් යුතු ඉකිලි අතර හිර වෙන පිරිමි යට ඇඳුම් දිගු කාලයක් පැළඳ සිටීම හේතුවෙන් සම තුවාල වීම මඟින් එක එල්ලයේ ම ගමනේ සාර්ථක භාවයට බලපෑමක් විය හැක.

 හිස් ආවරණ

හිරු එළියෙන් හොඳින් ආවරණය ලබා දෙන තොප්පියක් එවරස්ට් මූලික කඳවුර තරණට සඳහා ඔබ අනිවාර්‍යන්ම එකතු කර ගත යුතු දෙයක්. නැවතත් පහසුවෙන් ඇසිරිය හැකි මෙන්ම බරින් අඩු විකල්පයක් තෝරා ගන්න.

සීතල කාළගුණයක දී පැළඳීම සඳහා හොඳ අයිස් කැප් (beanie) එකක් ඔබ සතුව තිබීමත් ඉතාමත් වැදගත්.  මෙමඟින් ඔබේ දෙකන් , බෙල්ල ප්‍රදේශය හා හිස සීතලෙන් ආරක්ෂා කර ගන්න පුළුවන්.

අත් වැසුම්

ඔබගේ දෙ අත් සීතලට මුලින් ම නිරාවරණය වන ශරීරයේ අවයවයන් අතරින් එකක්. මේ හේතුව නිසා සීතලෙන් ඔබේ අත ප්‍රවේශම් කර ගැනීමට සුදුසු අත් වැසුම් පාවිච්චිය ඉතාමත් වැදගත්.

ඒ වගේම තමයි, ගමනේ ආරම්භයේ දී සිට ඔබේ සිරුරට සීතල කාළගුණය හුරු කිරීමට සීතලෙන් අඩු මුල් දින කිහිපයේ දී අත් වැසුම් පැළඳීම ත් කළ හැකි දෙයක්.

වැසි සහිත කාළ ගුණයක දී පැළඳීම සඳහා ජලය නොරදන අත්වැසුම් යුගළයක් සහ සවස සහ රාත්‍රී කාලයේ පැළඳීම සඳහා එක් අත් වැසුම් යුගළයක් ද සුදුසු වේ.

සපත්තු

එවරස්ට් මූලික කඳවුර හෝ වෙනත් ඕනෑම කඳු තරණයක දී ඔබේ අවධානය අනිවාර්‍යයෙන්ම යොමු විය යුතු ශරීරාංගයක් තමයි, ඔබේ දෙපා. මෙහි දී දෙපා ආරක්ෂාව සඳහා සුවපහසු හා නිසි අංග උපාංග වලින් සැඳුම්ලත් සපත්තු යුගලයක් තෝරා ගැනීම හා නිසි පරිදි භාවිතය ඉතාමත් වැදගත්.

නිසි ලෙසින් ඔබේ දෙපා වලට සවි නොවුණු සපත්තු පැළඳීමෙන් දිය බුබුලු ඇති විය හැක.

 Anatomy, Types And How to choose - Hike Brothers


ඒ වගේම තමයි කඳු තරණයට පෙර ඔබ තෝරා ගන්නා පාවහන් යුගළය පැළඳීම මඟින් ඔබේ දෙපයට හුරු කර ගන්න.

කඳු තරණයට සුදුසු සපත්තු /  පාවහන් තෝරා ගැනීමේ දී ඔබට ප්‍රධාන වශයෙන් විකල්ප තුනක් අතුරින් තෝරා ගැනීම කරන්නට පුළුවන්. හයිකින් බූට්ස් (Hiking boots), හයිකින් ෂූස් ( Hiking shoes), හයිකින් සැන්ඩ්ල්ස් (Hiking Sandals) යනු ඒ විකල්ප ත්‍රිත්වයයි.

හයිකින් බූට්ස් තෝරා ගැනීමේ දී ජලය නොරදන , සැහැල්ලු නමුත් ශක්තිමත් සහ හොඳ ඝර්ෂණයක් සහිත අඩියකින් යුතු පාවහන් යුගළක් තෝරා ගැනීමට සැළකිලිමත් විය යුතුය. හයිකින් බූට්ස් වලින්, ඔබගේ වළලුකරට අමතර සහයක් ලබා ගන්නට පුළුවන්. මේ මඟින් දිගු දුර ඇවිදීමේ දී විඩාවට පත් වීමෙන් කකුළ පෙරළීමේ අවධානම අඩු කර ගත හැකිය.

හයිකින් ෂූස් එවරස්ට් මූලික කඳවුර තරණය සඳහා යනු එතරම් හොඳ විකල්පයක් නොවේ. නමුත් සවස් කාලයේ දී නවාතැන් ස්ථානය තුළ හා අවට ඇවිදීමේ දී පැළඳීම සඳහා බරින් අඩු සැහැල්ලු හයිකින් ෂූෂ් යුගළයක් හෝ මේස් සමඟ පැළඳිය හැකි හයිකින්ග් සැන්ඩ්ල්ස් යුගළයක් ඔබ සතුව තබා ගැනීම ඉතාමත් ප්‍රායෝගිකයි.

මේස්

කඳු තරණය සඳහා මේස් තෝරා ගැනීමේ දී මේ වෙනුවෙන් ම නිපද වූ මේස් කුට්ටම් තෝරා ගැනීමට සැළකිලිමත් වෙන්න. එම නිශ්පාදන මඟින් ඔබේ දෙපා සපත්තු සමඟ ගැටෙන ස්ථාන හඳුනාගෙන අමතර ආරක්ෂාවක් ලබා දෙනු ලබයි.

මේස් කුට්ටම් 5ක් පමණ රැගෙන යෑමෙන් ඔබට මාරුවෙන් මාරුවට පැළඳීමේ හැකියාව පවති.c

කඳු තරණයේ දී පළඳින මේස් කුට්ටම් වලට අමතර ව රාත්‍රියේ දී සීතලට පැළඳීමට ඝනකම් මේස් කුට්ටමක් ළඟ තබා ගැනීම ද සීතල රාත්‍රීන්හී දී ප්‍රයෝජනවත් වේවී.

කෙණ්ඩා ආවරණයක් - Gaiters

 ඔබේ සපත්තු යුගළයේ විවරයෙන් හිම කැබලි, කුඩා ගල් කැබලි සහ රොඩු ඇතුළු වීම වැළැක්වීමට මේ හොඳ විකල්පයකි. සපත්තුව තුළට ගල් කැබැල්ලක් ඇතුළු වීමෙන් පසුව ගළවා පිරිසිදු කිරීමට වෙන මහන්සියට සාපේක්ෂව ඇතැම් කඳු නඟින්නන් ගේටර් යුගළයක් පැළඳීමට කැමැත්තක් දක්වයි.

Rei.com


ගමන් මල්ල - Backpack

ඔබේ ආම්පන්න ලැයිස්තුවේ තවත් සුවිශේෂී ස්ථානයක් හිමිවිය යුතු අයිතමයක් තමයි බැක් පැක් එක කියන්නේ. සාමාන්‍යයෙන් එවරස්ට් මූලික කඳවුර තරණය සඳහා ලීටර 50 - 60 අතර ප්‍රමාණයක බැක් පැක් එකක් ප්‍රමාණවත්. බැක් පැක් එක විශාල වන්නට වන්නට එය රැගෙන යෑම අපහසු වනවා මෙන්ම අනවශ්‍යය දේ එකතු වීමටත් හැකියාවක් ඇති වේ.

 බැක් පැක් එකක් තෝරා ගැනීමේ දී හොඳ සවි ශක්තිය, භාවිතයේ පහසුවට නිපදවා ඇති පොකට් සහ වෙනත් අංග උපාංග පිළිබඳව සැළකිලිමත් විය යුතු වේ.

 එමෙන්ම ඔබගේ සිරුරට හොඳින් සවි වන නිමාව වගේම නොඳ වැහි ආවරණයක් සහිත වීමත් ඉතාමත් වැදගත්. ඔබේ ප්‍රධාන ගමන් මල්ලට අමතරව ලීටර 15 ක පමණ ගමන් මල්ලක් ඔබ සතුව තබා ගැනීමෙන් නිතර නිතර වුවමනා වන, ජලය සහ කෙටි කෑම වැනි දෑ පහසුවෙන් අසුරා ගැනීමේ හැකියාවත් පවතිනවා.

නිදන මල්ල - Sleeping Bag

රාත්‍රී කාලයේ සීතලෙන් මිඳීමට හොඳම විකල්පය  තමයි නිදන මල්ල. රාත්‍රී නවාතැන් පොළක රාත්‍රිය ගත කිරීම සඳහා නැවතුනත් විශේෂයෙන් ම පාන්දරට දැඩි සීතලක් ඇති වේ. හිමාලය කඳු කරයේ රාත්‍රී කාලයට ඇති වන දැඩි සීතලෙන් ඔබව ආරක්ෂා කළ හැකි තත්වයක හොඳ නිදන මල්ලක් තෝරා ගැනීම ඉතාමත් වැදගත්.

Sleeping advisor.org


කඳු තරණ යෂ්ඨි - Trekking Poles

පුද්ගලික කැමැත්ත මත, ඔබට මේ තෝරා ගැනීම කළ හැක. ඇතැම් කඳු නඟින්නන් පාවිච්චි කිරීමට කැමති අතර ඇතැම් කඳු නඟින්න එය සළකන්නේ අමතර බරක් ලෙසයි.

තෝරා ගැනීමේ දී බරින් අඩු මෙන්ම පහසුවෙන් හොඳින් අසුරා ගැනීම කළ හැකි නිශ්පාදනයක් වෙත අවධානය යොමු කරන්න.

 

අව් කණ්නාඩි

 මුහුදු මට්ටමේ සිට ඉහළට ගමන් කිරීමේ දී ඉතාමත් වැදගත් වේ. වෘත්තීමය උපදෙස් ලබා ගැනීමෙන් පසුව අව් කණ්නාඩියක් මිල දී ගැනීම ඉතාමත් වැදගත් වන අතරම සෑම පැත්තකින් ම ඇස් වලට හොඳ ආවරණයක් ලබා දෙන අව් කණ්නාඩි යුගලක් තෝරා ගන්න.

 

How to Choose Right Sunglasses - Armenian Geographic

ජලය -

 සාමාන්‍යයෙන් ඔබ සතුව සෑම විටම ජලය ලීටර 2ක පමණ ප්‍රමාණයක් ළඟ තබා ගන්න. නිරන්තරව ජලය පානක කිරීම මඟින් විජලනය, හිසරදය මෙන්ම කඳු උණ ඇති වීමේ අවධානම ද අවම කර ගන්නට පුළුවන්. ගමන අතර මඟ දී හමුවන නවාතැන් වල දී ඔබට ජලය පුරවා ගන්නට පුළුවන්.

 

 

ජංගම දුරකථනය

 ගමනේ බොහෝ ස්ථාන සඳහා දුරකථන ජාල සම්බන්ධතාවය නොතිබෙන්නට පුළුවන් නමුත්, ඉක්මන් ඡායාරූපයක් ගැනීම සඳහාත් ජංගම දුරකථනය හොඳ විකල්පයක්. මීට අමතර ව ඔබ නේපාලයෙන් ගොඩ බැසීමෙන් පසුව, නේපාල සිම් පතක් සුදුසු අන්තර්ජාල සම්බන්ධතා ධාරිතාවයක් සමඟ මිල දී ගන්නටත් අමතක කරන්නට එපා.

ජංගම දුරකථනය සඳහා නැවත ආරෝපණය සඳහා වුවමනා කේබලය අමතක නොකරන්නටත්, වැස්සෙන් ආරක්ෂා කර ගැනීම සඳහා සුදුසු ආවරණයක් රැගෙන යාමටත් අමතක කරන්නට එපා.

කැමරාවක්

ඔබ වෘත්තීමය ඡායාරූප ශිල්පියෙක් නම් ඔබේ මේ ගමනේ ප්‍රධානම අරමුණක් ලෙසින් හිමාලය කඳු කරයේ ඡායාරූප ගැනීම බව අවිවාධාත්මකයි. ඒ මේ කෙසේ නමුත්, සාමාන්‍යය හොඳ තත්වයක කැමරාවක් ඔබ සතුව තබා ගැනීම මඟින් ගවේෂණයේ රස මුසු තැන් ඡායාරූපයට නඟා ගන්නට පුළුවන් වේවී. ඒ වගේ ම තමයි වුවමනා අමතර බැටරි හා ආරෝපණය කිරීම සඳහා වුවමනා කේබල් හා අනෙකුත් උපකරණ අමතක කරන්නට එපා. ගමන අතර මඟ දී හමුවන නවාතැන් පළහී දී ඔබට මේ සඳහා අවශ්‍යය විදුලිය යම් මිලක් දීමෙන් ලබා ගන්නට පුළුවන්.

එමෙන් ම මේ සියල්ල ඔබගේ ගමන් මල්ලට එකතු කරන බර පිළිබඳව ත් හොඳ අවබෝධයකින් පසු වීම අනිවාර්‍යන්ම කළ යුතු දෙයක්.

 

මුදල් හා ක්‍රෙඩිට් කාඩ්

ගවේෂණය අතර මඟ දී ඔබේ අවශ්‍යතාවයන් සඳහා වියදම් කිරීමට ඔබ සතුව මුදල් තබා ගැනීම අනිවාර්‍යයෙන්ම කළ යුතු දෙයක්. මේ සඳහා නේපාල මුදල් හා ඇමරිකන් ඩොලර් මුදල් යන විකල්පයන් දෙකම සඳහා සූදානම් වී සිටීම වඩාත් සුදුසුය. මෙහි දී මතක තබා ගත යුතු අනෙක් කාරණය නම් විශාල අගයකින් යුතු මුදල් නෝට්ටු වෙනුවට කුඩා අගයකින් යුතු නෝට්ටු ඔබ සන්තකයේ තබා ගන්න. එමෙන්ම ඔබ සතු සියළුම මුදල් එක් ස්ථානයක තැබීමෙන් වළකින්න.

ඉන වටා පැළඳිය හැකි කුඩා මල්ලක ඔබේ ගමන් බලපත්‍රය හා අනෙකුත් අවසර පත් සමඟ යම් කිසි මුදලකුත් තබා ගෙන තවත් ස්ථාන කිහිපයක ඉතිරි මුදල සඟවා තබා ගන්න.

හදිසියකදී භාවිතා කිරීමට ක්‍රෙඩිට් කාඩ් පතක් සන්තකයේ තබා ගැනීමටත් අමතක කරන්නට එපා. නමුත් ගමන් මාර්ගයේ දී ක්‍රෙඩිට් කාඩ්  පත මඟින් ගෙවීම් කළ හැකි ස්ථාන අල්ප විය හැක.

අත්‍යාවශ්‍යය ලියකියවිලි

සාගර්මාතා උද්‍යානයට ඇතුළුවීමේ ප්‍රවේශපත්‍රය සහ කඳු තරණය සඳහා ලබා ගත් අවසර පත්‍රය මෙන්ම ඉහළ කඳු මුඳුන් තරණය ආවරණය කරන හා හෙලිකොප්ටර් යානා මඟින් ගළවා ගැනීමේ මෙහෙයුම් සිඳු කරන රක්ෂණ ආවරණයක් ලබා ගැනීම ඔබ විසින් කළ යුතුයි. අනන්‍යතාවය තහවුරු කිරීමට අවශ්‍යය ලියකියවිලි ඔබ සතුව තබා ගන්න.

ඔබගේ ගමන් බලපත්‍රයත් මේ අතරට එක් විය යුතුයි.

Everest Base Camp Trek Permit -  Magical Nepal

බෙහෙත් හා ප්‍රථාමාධාර

ඔබගේ සෞඛ්‍යය තත්වය හා රෝගාබාධ අනුව ඔබට වුවමනා බෙහෙත් වර්ග ඔබ සතුව සුදුසු ප්‍රමාණයන්ගෙන් ළඟ තබා ගන්න. හදිසි අවස්ථාවක දී ඒ සඳහා ඔබට සහාය වන ආකාරය ඔබ සමඟ ගමන් ගන්නා සඟයෙකු දැනුවත් කර තබන්න.

මීට අමතරව හොඳ ප්‍රථාමාධාර කට්ටලයක් සහ සුළු සුළු ආබාධ සඳහා භාවිතා කළ හැකි බෙහෙත් වර්ග ඔබ සතුව තබා ගැනීමත් කරන්නට පුළුවන්. නමුත් සෑම විටම කඳු තරණය සඳහා ඔබේ මව් රටින් පිට වීමට පෙරාතුව  ඔබේ පවුලේ වෙදතුමා හමු වී ඔහුගේ නිර්දේශය මේ වෙනුවෙන් ලබා ගැනීම වඩාත් ආරක්ෂාකාරී වේ.

 

වැසිකිළි කැසිකිළි අවශ්‍යතා සඳහා වුවමනා දේ - Toiletries

·         ප්‍රමාණයෙන් කුඩා දත් බුරුසුවක්

·         ප්‍රමාණයෙන් කුඩා දන්තාලේප ටියුබයක්

·         මුව සෝදන දියරයක් (Mouth wash)

·         ටොයිලට් පේපර් රෝල් කිහිපයක් (4ක් පමණ )

·         කාන්තා සනීපාරක්ෂක ද්‍රව්‍යය

·         ඇඟ පිස දැමීමට තරමක් විශාල තුවායක් (බරින් අඩු, ඉක්මනින් වියැළෙන, පහසුවෙන් ඇසිරිය හැකි)

·         මුහුණ අත පය  පිස දැමීමට ප්‍රමාණයෙන් කුඩා තුවායක් (බරින් අඩු, ඉක්මනින් වියැළෙන, පහසුවෙන් ඇසිරිය හැකි)

 

මුත්‍රා පුනීලය - Pee Funnel

රාත්‍රී නවාතැන් ස්ථාන සියල්ලක ම ඉතාමත් හොඳ තත්වයේ වැසිකිළි පහසුකම් පවතින නමුත්, රාත්‍රී කාලයේ දී ඇතිවිය හැකි සීතල කාළගුණයත් සමඟ ඔබට ඔබගේ නිදන මල්ලෙන් ඉවත් වී කාමරයෙන් එළියට ගමන් කිරීම තරම ක අරගලයක් විය හැක. නමුත් අධික විඩාවත් සමඟින් නිසි නින්දක් අත්‍යාවශ්‍යය බැවින් නිදි නොලබා වැසිකිළි යෑමේ වුවමනාව කල් දමමින් නිදි වැරීම සුදුසු දෙයක් නොවෙයි. මේ සඳහා මේ විකල්පය ගැහැණු පිරිමි බේදයකින් තොරව භාවිතා කළ හැකි සාර්ථක විසඳුමකි. සහ එකිනෙකාගේ කැමැත්ත අනුව භාවිතා කිරීම හෝ නොකිරීම කරන්නට පුළුවන්.

අත් පිරිසිදු කිරීමේ දියරයක් - Hand Sanitizer

ආහාර ලබා ගැනීමට පෙර ඔබේ දෑත් පිරිසිදු කර ගැනීමට ඉතාමත් වැදගත් වෙනවා. විශේෂයෙන් ජලය අධික සීතලෙන් යුතු ප්‍රදේශයන් හී දී.

ආහාර

ඔබ විසින් මඟ පෙන්වන සමාගමක සහාය මේ ගමන සඳහා ලබා ගත්තේ නම් ඔවුන් විසින් දවසේ ප්‍රධාන ආහාර වේල් තුන ඔබට ලබා දේ වී. නමුත් වෙහෙසකර මෙම ගමනේ දී වැයවන ශක්තිය නැවත ලබා ගැනීමට ත්, ආහාර වල රසයේ වෙනසක් ලබා ගැනීම සඳහා ශක්ති ජනක ආහාර හා පාන එක්තරා ප්‍රමාණයක් ඔබ ළඟ තබා ගැනීම ඉතාමත් වැදගත්. මෙහි දී ඔබ විසින් භාවිතා කරන් ලද මෙම ආහාරවල අසුරණ නිසි පරිදි ළඟ තබාගෙන නැවත කත්මණ්ඩු නුවර ට පැමිණි පසු නිසි ලෙසින් බැහැර කරන්නටත් අමතක කරන්නට එපා.

 

අලුත් වැඩියා කිරීමේ කට්ටලයක්

සති දෙකක් පමණ පුරාවට දිවෙන මෙම ගවේෂණයේ දී සිඳු විය හැකි සුළු සුළු නඩත්තු කටයුතු සඳහා වුවමනා විය හැකි දේ ඔබ ළඟ තබා ගෙන සිටීම ඉතාමත් වටිනවා. උදාහරණ වශයෙන් බැක් පැක් එකෙහි ඉරුණු පටියක් මසා ගැනීමට සුදුසු නූල් හා ඉඳි කටු, කැඩුණු සපත්තුවක් අලවා ගැනීමට ගම් වර්ගයක්

 

    අනෙකුත් දේ

·         සුදුසු ජල පිරිපහසු ක්‍රමයක් - උදාහරණ Water Purification Tablets

·         ලිප් බාම් - Lip balm (SPF 30 හෝ ඉහළ අගයකින්)

·         සන්ස්ක්‍රීන් -Sunscreen (SPF 30 හෝ ඉහළ අගයකින්)

·         වෙට් වයිප්ස් - Wet wipes

·         පෝටර්බල් චාජරයක් - Portable Charger

·         කියවීමට ඔබ ප්‍රිය කරන පොතක්

·         සටහන් පොතක් සහ පැන්සලක් - පෑන් තීන්ත සමහර අවස්ථාවල දී සීතලත් සමඟින් ඵල රහිත විය හැක.

·         කුඩාඅඟුලක් - ඔබගේ ගමන් මළු ආරක්ෂිත වසා තැබීමට

·         කුඩා වෝටර්පෲෆ් මල්ලක් - ඔබගේ වටිනා ලියවිලි සහ මුදල් වැස්සෙන් ආරක්ෂා කර ගැනීමට

·         බහුකාර්‍යය උපකරණයක් - Multi tool - ගමන අතර තුර විවිධ අවස්ථාවල දී ප්‍රයෝජනවත් විය හැක. කුඩා පිහියක්, කුඩා කතුරක් සහිත

·         විදුලි පන්දමක් - හිසේ පැළඳි‍ය හැකි විදුලි පන්දමක් වඩාත් සුදුසු වේ. එමෙන්ම අමතර බැටරි කිහිපයක් අමතක කරන්නත් එපා.

 

 

හොඳයි, මේ සමඟ අද අපි කතා කළ මාතෘකාවේ අන්තර්ගතය අවසන් වෙනවා.

අපේ මීළඟ ලිපියෙන් එවරස්ට් මූලික කඳවුර තරණය සඳහා ශාරීරිකව හා මානසිකව සූදානම් වීම ගැන කතා කරන්නයි අපේ සූදානම.

ස්තූතියි.

Scan Alpine කණ්ඩායම






 


Thursday, February 18, 2021

එවරස්ට් මූලික කන්ද තරණයේ ගමන් මඟ

සුබ දවසක්!

Scan Alpine පසුගිය ලිපියෙන් අපි කතා කළා එවරස්ට් මූලික කඳවුර තරණයේ දී හමුවන අභියෝග පිළිබඳ ව කතා කළා.

එවරස්ට් මූලික කඳවුර 
ඡායාරූපයඇවිදින්නෝ 2016 එවරස්ට් මූලික කඳවුර ගවේෂණය


අද අපි කතා කරන්න බලාපොරොත්තු වන්නේ මූලික කඳවුර තරණයේ ගමන් මාර්ගය පිළිබඳව. ඒ කියන්නේ ඔබ ශ්‍රී ලංකාවෙන් පිටත් වූ මොහොතේ සිට එවරස්ට් මූලික කඳවුර වෙත ගමන් ගන්නා තෙක් පියවරෙන් පියවර ගමනාන්තයන් පිළිබඳව යි. මේ සඳහා ඔබ මුලින්ම කරන්න වුවමනා දේ තමයි, ඉතාමත් හොඳින් මේ ගමන පිළිබඳව විස්තර හොයා බැලීමක් කරන එක. ඒ අනුව, ඔබට ආරක්ෂාකාරීව හා සාර්ථකව මේ අභියෝගය ඉටු කර ගැනීමට වුවමනා කරන මුදල, කාලය, පුහුණුව හා අනෙකුත් සම්පත් පිළිබඳව අවබෝධයක් ලබා ගන්නට පුළුවන්.

හොඳයි, ඔබ මුහුණ දෙන පළමු අභියෝගය තමයි ශ්‍රී ලංකාවේ සිට නේපාලය දක්වා පියාසර කිරීම.

වර්ත්මානයේ දී ශ්‍රී ලංකාවේ සිට නේපාලය වෙත එකවර පියාසර කිරීමට ගුවන් වාර නැති නමුත් අසල් වැසි ඉන්දියාව හරහා නේපාලය වෙත ළඟ විය හැක.

මේ සඳහා ප්‍රධාන ක්‍රම දෙකක් තිබෙනවා.. ඒ ඒ ක්‍රමය වෙනුවෙන් වැය වන කාලය, මුදල වගේම ඒ ඒ ක්‍රමයේ වාසි හා අවාසි තිබෙනවා.

පළමු ක්‍රමය තමයි, ශ්‍රී ලංකාවේ සිට ඉන්දියාවේ චෙන්නායි බලා පියාසර කර, එතැන් පටන් දුම් රියෙන් ඉන්දියානු - නේපාල දේශ සීමාව දක්වා ගමන් කිරීම. මේ දුම් රිය ගමන සඳහා සාමාන්‍යයෙන් දින තුනක පමණ කාලයක් වැය වෙනවා. පා ගමනින් දේශ සීමාව පසු කිරීමෙන් පසුව, නේපාලයේ කත්මණ්ඩු අග නුවර තෙක් වාහනයක් කුළියට ගැනීම කරන්නට පුළුවන්.

Tibet train by Explore Tibet


සාපේක්ෂව ඉතාමත් මිලෙන් අඩු ක්‍රමයක් වුණත්, අවාසි විදියට ගත්තොත් දුම් රිය ගමන සඳහා අධික ලෙසින් කාලය වැය වීම, දින තුනක කාලයක් තුළ දුම් රිය තුළ විඩාවට පත් වීම වගේම ආහාර හා ජලය නිසි ලෙසින් ඝෝචර නොවීමෙන් ඇතිවිය හැකි පාචන තත්වයන් හඳුන් වන්න පුළුවන්.

ඒ වගේම තමයි වක්‍රාකාරව ගමන් මළු අස්ථාන ගතවීම්, වෙනත් මඟීන් ගේ තාඩන පීඩන වලට නිරාවරණය වීම වගේ දේවල් දක්වන්න පුළුවන්. අසල්වැසි ඉන්දියාවේ බොහොමයක් දෙනා ශ්‍රී ලාංකික අපිට බොහොම මිත්‍රශීලී නමුත්, අල්ප වූ කොටසක් ශ්‍රී ලංකාකිකයන් කෙරෙහි දක්වන්නේ එතරම් මිත්‍රශ්‍රීලී ආකල්පයක් නොවෙයි. ඉතිං නොදැනුවත් කම නිසා මේ වැරදි ආකලප්යක ගොදුරක් නොවීමට ප්‍රවේශම් වෙන්න.

දෙවන ක්‍රමය තමයි, ශ්‍රී ලංකාවේ සිට ඉන්දියාවේ නව දිල්ලි ගුවන් තොට වෙත පියාසර කර එහි සිට, නේපාලයේ කත්මණ්ඩු ගුවන් තොටු පළ වෙත වෙනත් ගුවන් යානයකින් ගමන් කිරීම.

සාපේක්ෂව මිලෙන් වැඩි වුණත්, විශේෂයෙන් ම ඔබ ගමන් කරන්නේ සීමිත කාල රාමුවක නම් මේ ඉතාමත් හොඳ විකල්පයක්. ඒ වගේම තමයි, වඩාත් ආරක්ෂාකාරීව ගමන් කිරීමටත්, ආහාර පාන ආදිය නිසි ලෙසින්, පිරිසිදුව ලබා ගන්නටත් පුළුවන්.

මේ මොන ක්‍රමය යටතේ ගමන් කළත්, ශ්‍රී ලංකාවෙන් පිටත් වීමට පෙර ඔබගේ ගුවන් ගමන් බලපත්‍රය, ගුවන් ටිකට් පත වගේම නිසි කාණ්ඩයෙන් වීසා ලබා ගැනීමටත් අමතක කරන්නට එපා. ඒ වගේම අනෙක් කාරණය තමයි සංචාරක රක්ෂණයක් ලබා ගෙන තිබීමත් ඉතාමත් වැදගත්.

 

කත්මණ්ඩු නගරයට ළඟා වීමෙන් පසුව ඔබටත් තවත් විකල්පයන් දෙකක් තිබෙනවා.

පළමු ක්‍රමය වන්නේ කත්මණ්ඩු නුවර සිට, ලුක්ලා ගුවන් තොටුපළ වෙත අභ්‍යන්තර ගුවන් ගමනකින් පියාසර කිරීමයි. මේ සඳහා සාමාන්‍යයෙන් විනාඩි 40 ක පමණ කාලයක් වැය වෙන නමුත් සමහර අවස්ථාවල දී අයහාපත් කාළගුණික තත්වයන් හේතුවෙන් ගුවන් ගමන් කල් දැමීමත් සිඳු විය හැකියි.

ඡායාරූපයආනන්ද විද්‍යාලයීය 2007 එවරස්ට් මූලික කඳවුර ගවේෂණය


කළින් ලිපියකිනුත් අපි කතා කළ මේ ලුක්ලා ගුවන්තොට පිහිටා තිබෙන්නේ එවරස්ට් මූලික කඳවුර කරා යොමුවන  ගමන් මගේ ආරම්භයේ.

අනෙක් ක්‍රමය නම්, කත්මණ්ඩු සිට ජීරී (Jiri) (මීටර 1951) නම් ගම්මානය හරහා ලුක්ලා වෙත බස් රථයකින් හා පා ගමනින් ගමන් කිරීමයි. මේ සඳහා සාමාන්‍යයෙන් දින 5 ක් පමණ ගත වෙන නමුත්, වියදිම අතින් ලාබදායි ක්‍රමයක් වෙනවා වගේම, මුහුදු මට්ටමේ සිට එක්වර වැඩි උසකට පියාසර කර ගොඩ බැසීමේ ක්‍රමයට වැඩියෙන්, ඔබගේ සිරුර නිසි ලෙසින් පරිසරයට අනුගත කර ගැනීම සඳහා ද ඉතාමත් හොඳ විකල්පයකි. විශේෂයෙන් එවරස්ට් කඳු මුඳුන කරා ගවේෂණයේ යෙදෙන්නන්, මේ මාර්ගය තෝරා ගනී.

හොඳයි, ඉහත සඳහන් කුමන විකල්පයක් තෝරා ගත්තත් ඔබ ගමන් මඟ ආරම්භ වන්නේ ලුක්ලා සිටයි. මෙහි දී තවත් තෝරා ගැනීමක් ඔබට කරන්නට වෙනවා. ඒ තමයි, මේ සම්පූර්ණ ගමන සඳහා ඔබ කොපමණ කාලයක්, එහෙමත් නැත්නම් දින ගණනක් යොදා ගන්නවා ද කියන කාරණය.

ලුක්ලා සිට එවරස්ට් මූලික කඳවුර තෙක් ගමන් කර ආපසු ලුක්ලා තෙක් ගමන් මඟ දළ වශයෙන් කිලෝ මීටර 130 ක් පමණ වේ.

හොඳයි, එවරස්ට් මූලික කඳවුර තරණයේ දී මුලින් ම අපි බලන්න ඕනේ අපිට මේ සඳහා වැ‍ය කරන්න පුළුවන් කාලය හා මුදල කොපමණද කියන කාරණය. මුහුදු මට්ටමේ සිට ඉහළට ගමන් කිරීමේ දී ඒ හා සමඟ ම ආහාර, නවාතැන් හා අනෙකුත් පහසුකම් වල මිල ගණන් ද ඉතාමත් අහළ අගයක් ගනී. මේ සඳහා ප්‍රායෝගික හේතුව ලෙසින් ඒ ඒ ස්ථාන වලට, එම ද්‍රව්‍යය ගෙන යෑමට එම කඳුකර වැසියන්ට දැරීමට සිඳු වූ මහන්සිය දක්වන්න පුළුවන්.

ඉතිං මේ කාරණය නිසා, කඳු පන්තිය ආශ්‍රිත ව වැය කරන කාලය අඩු වන තරම ට ඔබේ සාක්කුවට වාසිදායක යි.

නමුත් අනෙක් පසින් ගත් කළ, අප පසු ගිය ලිපියකින් කතා කළ පරිද්දෙන්, මේ කඳු පන්තිය ආශ්‍රිතව පවතින අපහසුතා (උදාහරණ: සීතල, හුස්ම ගැනීමේ අපහසුතා, කඳු උණ ) නිසා ඔබේ ශරීරයට ලබා දිය යුතු නිසි විවේකය අනිවාර්‍යැයෙන් ම ලබා දිය යුතු වෙනවා. උදාහරණයක් ලෙසින්, මෙම ගමන් මඟෙහි එක් එක් ස්ථානයන් හී දී ඔබ අනිවාර්‍යෙන් ම අවම දිනක විවේකයක් වත් ලබා ගත යුතු ස්ථාන කිහිපයක් තිබෙනවා.

මේ ක්‍රියාව සරල ව හඳුන්වන්නේ “Climb high – sleep low ”ලෙසින්. එනම් දිවා කාලයේ දී ඔබ මුහුදු මට්ටමෙන් එක්තරා උසකට ගමන් කළ පසු, රාත්‍රියේ දී  නින්ද සඳහා මඳක් පහත ස්ථානයක නවාතැන් ගැනීමයි. මේ මඟින් ඔබගේ විඩාපත් සිරුරට නිසි ලෙසින් ඒ උන්නතාංශයට අනුකූල වන්නට කාලය ලැබෙනවා. වැඩි වේගයෙන් ගමන් කිරීම මඟින් ඔබේ සිරුරට එම පාරිසරික වෙනස් වීම් දරා ගන්නට නොහැකි වීම මඟින් ජීවිත හානි පවා ඇති විය හැක.

 

Climb high – sleep low 

ඔබගේ මුදල් තත්වය වගේම ඔබගේ ශාරිරික තත්වයත් මෙසේ ඔබ කඳු තරණය සඳහා වැය කරන කාලය, එහෙමත් නැත්නම් දින ගණන තීරණය කිරීමේ දී ඉතාමත් වැදගත් වෙනවා. කටුක පාරිසරික තත්වයන් හා කාළගුණික තත්වයන් යටතේ සිඳු කරන මෙම ගමන නිසි ලෙසින් බාහිර ක්‍රියාකාරකම් වලට හුරු නොවූ, නිතිපතා ව්‍යායාම නොකරන අයෙකුට ඉතාමත් අපහසු කටයුත්තක් වේවි.

සාමාන්‍යයෙන් දින 10 සිට 18 දක්වා කාල පරාසයක් එවරස්ට් මූලික කඳවුර තරණය සඳහා යොමු වන්නන් තෝරා ගන්නවා. මේ දින ගණනට මූලික කඳවුර දක්වා ගමන, අතර මඟ විවේක ගන්නා දින හා ආපසු පැමිණීම සඳහා වැය වන දින ද ඇතුළත් වෙනවා.

ඔබගේ ප්‍රධාන දින සැළස්මට අමතරව, තවත්  අමතර දින කිහිපයක් වැඩි කර ගැනීමට උත්සාහා කරන්න.  ඒ දින කිහිපය හොඳින් විවේක ගැනීමට සහ නොසිතූ යම්කිසි අකරතැබ්බයකට ඔබට මුහුණ දීමට සිඳු වුව හොත්, ඒ සඳහා මේ අමතර දින කිහිපය ඉතාමත් වැදගත් වේවී.

අපේ අද ලිපිය සඳහා මම තෝරා ගත්තේ දින 15 ක ගමන් සැළැස්මක්.

පළමු දිනය

කත්මණ්ඩු කරා ළඟා වීම  (මීටර  1,400/ අඩි 4,593)

One can take the daily flight to Lukla from Kathmandu.

ගුවනින් කත්මණ්ඩු වෙත ළඟා වීමෙන් පසුව ඔබට දවසේ ඉතිරි කොටස විවේක ගැනීමටත්, අනෙකුත් සූදානම් වීමේ කටයුතු සඳහාත් පාවිච්චි කරන්නට පුළුවන්. මේ නිසා හැකිතාක් දුරට පෙර දින රාත්‍රියේ දී ඔබගේ ගුවන් ගමන්  යොදා  ගැනීමෙන් වටිනා කාලය ඉතුරු කර ගන්නට පුළුවන්.

කඳු තරණය සඳහා වුවමනා කරන උපකරණ, ඇඳුම් පැළඳුම් මිල දී ගැනීමට හෝ කුළියට ගැනීමට මෙන්ම, මේ ගවේෂණය සඳහා ඉතාමත් වැදගත් වන රක්ෂණ සහතිකයක් ලබා ගැනීමට ත් ඔබට මේ දවස ප්‍රයෝජනය ට ගන්නට පුළුවන්.

මීට අමතර ව ඔබ විසින් නේපාල ජාතික හෝ විදේශීය සංචාරක සේවා සපයන ආයතනයක සේවය ලබා ගත්තේ නම් එම නියෝජිතයන් හමු වී ඔබගේ ඉදිරි දින කිහිපය නිසි ලෙස සැළසුම් කර ගැනීමට පුළුවන්.

දෙවන දිනය

Kathmandu සිට Lukla (මීටර  2,860/ අඩි 9,383) – Phakding (මීටර  2,610/ අඩි 8,562) 

Phakding we12travel "the-trail-to-everest-base-camp-day-1 by Antonette 


කත්මණ්ඩු අගනුවර සිට අභ්‍යන්තර ගුවන් යානයක් මඟින් ඔබට විනාඩි 40 ක පමණ කාලයකින් ලුක්ලා ගුවන් තොට වෙත ළඟා විය හැක.

උදෑසනම දවස ආරම්භ කිරීම මඟින් ඔබට එදින ම ඔබේ මීළඟ නැවතුම වන Phakding, වෙත හදිසියකින් තොරව ළඟා විය හැක. පරිසරයට නිසි ලෙසින් අනුගත වීම උදෙසා පළමු දින ගමන සාපේක්ෂව දිගින් අඩුවේ. නැවතුම් හා ගිමන් නිවීම් අත හැර ගත් කළ සාමාන්‍යයෙන් පැය 4 ක පමණ කාලයක් ඔබට ගමනේ යෙදීමට සිඳු වේ.

 තෙවන දිනය

Phakding සිට Namche Bazaar (මීටර  3,440 / අඩි 11,286 ): 

දෙවන දින හොඳ විවේකයකින් හා සුව නින්දකින් පසුව තෙවන දින උදෑසනම ගමන ආරම්භ කිරීම වඩාත් සුදුසුයි. ඒ වගේම දේශගුණික වෙනස්වීම් හා උන්නතාංශයේ සිඳු වූ වෙනස්වීම් නිසා ඇතැමෙකු ට සුව නින්දක් නොලැබී තිබෙන්නටත් පුළුවන්. නමුත් හැකි ඉක්මනින් මේ පරිසරයට හුරු වීම ඔබේ වාසියට හේතු වේවි.

Phakding සිට Namche Bazaar දක්වා යෙදී ඇති ගමන තරමක් අභියෝගාත්මක වන්නේ පළමු දිනට සාපේක්ෂව වැඩි කාලයක් වැය වන නිසා වගේම ගමන් මඟ තරමක් ආනතියක් ගන්නා බැවිනි. සාමාන්‍යයෙන් පැය 5-6 ක පමණ කාලයක් ඔබට ගමනේ යෙදීමට සිඳු වේ.

සිව්වන දිනය

Namche Bazaar: අනිවාර්‍යය විවේකී දිනය

ගමන් මාර්ගයේ නවාතැන් පළක් (Tea house):
ඡායාරූපයආනන්ද විද්‍යාලයීය 2007 එවරස්ට් මූලික කඳවුර ගවේෂණය


බසාර් යන්නෙහි සරල සිංහල තේරුම නම් වෙළඳ පොළ යන්නයි. වචනයේ තේරුම වගේම එවරස්ට් මූලික කඳවුරු තරණයේ දී හමුවන ප්‍රධානතම ගම්මානය වන්නේ Namche යි.

මෙම විවේකී දිනය ඔබට හොඳ නින්දක් ලබා ගැනීමට අමතරව, ගම්මානයේ අවට ඇවිදීමට, ඇති කඩ සාප්පු වලින් ඔබට අවශ්‍යය දෙයක් මිලදී ගැනීමට වගේ දෙයකට වැය කරන්න පුළුවන්.

ඒ වගේම තමයි ගමන් මාර්ගයේ දී ඔබට පළමු වරට එවර්ස්ට් කඳු මුඳුන දකින්නට අවස්ථාව ලැබෙන්නේත් Namche Bazaar දීයි.

මෙම අනිවාර්‍යය විවේකී දිනයේ අරමුණ වන්නේ ඔබේ සිරුර මේ අලුත් පරිසරයට අනුගත කිරීම බව අමතක කරන්නට එපා. පෙර දින ගමන් විඩාව නිසා මුළු දවසම ඔබේ නවාතැනට වී කාලය ගත කිරීමෙන් ඒ අරමුණ නිසි පරිදි ඉෂ්ඨ නොවේ.


පස්වන දිනය

Namche සිට Tengboche (මීටර  3,860/ අඩි 12,664)

Namche bazaar Nepal - Audley Travel


 ෂර්පා ගම්මානයක්:
ආනන්ද විද්‍යාලයීය 2007 එවරස්ට් මූලික කඳවුර ගවේෂණය  

Namche සිට Tengboche මෙම ගමනට සාමාන්‍යයෙන් පැය 4-5 ක පමණ කාලයක් ඔබට ගමනේ යෙදීමට සිඳු වේ.

නේපාල ෂර්පා ප්‍රඡාවට අයත් ටිබෙට් බෞද්ධ ආරාමයක් වන Tengboche Monastery පිහිටා තිබෙන්නේ ද මේ  ගම්මානයේ යි. එවරස්ට් කඳු මුඳුන තරණය කරන්නන්, මෙම ආරාමය වන්දනාමාන කිරමින් ආරක්ෂාකාරී හා සාර්ථක කඳු තරණයක් සඳහා ආශිර්වාද ලබා ගැනීම සිඳු කරයි.

 

හය වන දිනය

Tengboche සිට Dingboche (මීටර  4,410/ අඩි 11,468)

Tengboche ආරාමය ඉදිරිපස:
ඡායාරූපයආනන්ද විද්‍යාලයීය 2007 එවරස්ට් මූලික කඳවුර ගවේෂණය


Tengboche සිට Dingboche ගමන ද සාපේක්ෂව වැඩි කාලයක් ගතවන ගමන් මඟකින් යුක්ත වේ. සාමාන්‍යයෙන් පැය 5-6 ක පමණ කාලයක් ඔබට ගමනේ යෙදීමට සිඳු වේ. මෙම ගම්මානයට සුන්දර Ama Dablam කඳු මුඳුන ඉතාමත් පැහැදිලිව දර්ශනය කරන්නට පුළුවන්.

හත්වන දිනය

Dingboche අනිවාර්‍යය විවේකී දිනය

Namche හි ඔබ ගත කළ විවේකී දිනය Dingboche හී දීද ඔබේ විවේකී දිනය ඵලදායී ලෙස ගත කරන්නට ඔබට පුළුවන්. උදාහරණයකට සුන්දර දර්ශන වලින් පොහොසත් Chhukung නිම්නයේ ඇවිදීමට යෑම හොඳ විකල්පයක්. නමුත් Namche හි මෙන් මෙම ගම්මානයේ කඩ සාප්පු බහුල නැත.

අට වන දිනය

Dingboche සිට Duglha-Lobuche (මීටර  4,940 / අඩි 16,108): 

සාමාන්‍යයෙන් පැය 5-6 ක පමණ කාලයක් ඔබට ගමනේ යෙදීමට සිඳු වේ.

මේ වන විට ඔබ යම් කාලයක් ඉහළ උන්නතාංශයේ ගත කර තිබෙනවා. ඒ හා සාපේක්ෂව තෙහෙට්ටුව, ආහාර අරුචිය, නිසි ලෙසින් නින්ද නොයෑම ආදිය ද අත්දකින්නට විය හැකියි. ඒ වගේම පරිසරයේ වඩාත් සීතල තත්වයක් ඔබට දැනේවී.

Lobuche බලා ගමන් ගන්නා මාර්ගයේ දී එදා මෙදා තුර එවරස්ට් හා අනෙකුත් කඳු මුඳුන් තරණයේ දී මිය ගිය ෂර්පාවරුන් හා බටහිර කඳු නඟින්නන් සිහිපත් කිරීම වෙනුවෙන් ගල් මඟින් ඉදි කර තිබෙන සිහිවටන රාශියක් ඔබට දකින්නට පුළුවන්. මෙම ප්‍රදේශය කඳු නඟින්නන් අතර Chukpilhara නමින් ප්‍රසිද්ධියක් උසුලයි.

නව වන දිනය

Lobuche, Gorak Shep (මීටර  5,164/ අඩි 16,942) සිට Kalapatter (මීටර  5,545/ අඩි 18,192)

Approaching Gorak Shep: theroadtoanywhere.com


Lobuche සිට Gorak Shep හරහා ළඟ විය යුතු Kalapatter (මීටර  5,545/ අඩි 18,192) කඳු මුඳුන එවරස්ට් කඳු මුඳුන මනස්කාන්තම ලෙසින් දර්ශනය කළ හැකි ස්ථානය ලෙසින් ප්‍රසිද්ධියක් උසුලයි.

සාමාන්‍යයෙන් පැය 5-6 ක පමණ කාලයක් ඔබට ගමනේ යෙදීමට සිඳු වේ.එමෙන්ම රාත්‍රී නවාතැන් ගැනීම සඳහා ඔබට නැවතත් Gorak Shep වෙත ළඟා වීමට සිඳු වේ.

 

 

දහ වන දිනය

Gorak Shep සිට EBC (මීටර  5,364 / අඩි 17,598)

Gorak Shep සිට එවරස්ට් මූලික කඳවුර තරණය කරන දහවන දිනය, ඔබගේ උත්සාහයේ හා කැපකිරීමේ ප්‍රතිඵල ලැබෙන දිනයයි. ඔබගේ කැමරා ආම්පන්න නිසි ලෙසින් සූදානම් කර තබා ගන්නත් අමතක කරන්නට එපා.

සාර්ථක ගමනක අවසානයේ දී එදිනම සුදුසු විවේකයක් ලබා ගැනීමෙන් පසුව Lobuche හෝ Pheriche වෙත නැවත පැමිණීම කළ යුතු වෙනවා.

සාමාන්‍යයෙන් පැය 5-6 ක පමණ කාලයක් ඔබට ගමනේ යෙදීමට සිඳු වේ.

එකොළොස්වන දිනය

Pheriche සිට Namche Bazaar: 5-6 hour

ඔබ එවරස්ට් මූලික කඳවුර කරා ගමන් කළ මාර්ගයෙන් ම නැවත ආපසු පැමිණීම දැන් සිඳු වෙනවා. පළමු වරට එම ප්‍රදේශයන් පසු කිරීමේ දී ඔබට මඟ හැරුණු විශේෂ ස්ථාන තිබේ නම්,මේ ඒ සඳහා හොඳම අවස්ථාවක්. සාමාන්‍යයෙන් පැය 5-6 ක පමණ කාලයක් ඔබට ගමනේ යෙදීමට සිඳු වේ.

දොළොස්වන දිනය

Namche Bazaar සිට Phakding සිට Lukla: 

මේ සම්පූර්ණ ගමනේ ම දීර්ඝත ම දිනයක් ලෙසින් හැඳින්විය හැක. නමුත් සාර්ථක ගවේෂණය ක සිතුවිලි ඔබගේ විඩාව සුළු වශයෙන් හෝ දුරු කරාවි. සාමාන්‍යයෙන් පැය 7-8 ක පමණ කාලයක් ඔබට ගමනේ යෙදීමට සිඳු වේ.


Lukla වෙත පැමිණීමෙන් පසුව හොඳ විවේකයක්, නින්දක්, ඔබ ආසා කරන කෑමක්, ඒවගේම ඔබගේ විඩාපත් දෙපා සඳහා හොඳ පාද සම්භාහනයක් වුවත් කර ගැනීමට මේ හොඳ අවස්ථාවක්.

දහතුන් වන දිනය

Lukla සිට Kathmandu

අභ්‍යන්තර ගුවන් ගමනකින් උදෑසනම Lukla සිට Kathmandu කරා ළඟා වීමට ඔබට පුළුවන්. පසු දින නැවත ඔබගේ මව් රට බලා පිටත් වීමට පෙර, දවසේ ඉතිරි කොටස කත්මණ්ඩු නගරයේ ඇවිදීමට, ඔබගේ ප්‍රියයන් වෙනුවෙන් යමක් මිල දී ගැනීමට කාලය වෙන් කිරීමට ඔබට පුළුවන්.

 

දහ හතරවන දිනය

නැවත මව් රට බලා පිටත් වීම

පහ ළොස්වන දිනය

හදිසි අවස්ථාවක් සඳහා අතිරික්ත දිනය.

 

හොඳයි අපි අද කතා කළේ එවරස්ට් මූලික කඳවුර තරණයේ ගමන් මාර්ගයේ විස්තරය. අප විශ්වාස කරනවා ඔබටත් දැන් එවරස්ට් මූලික කඳවුර තරණය පිළිබඳව දළ අදහසක් ලැබෙන්නට ඇතැයි කියා.

නමුත් මතක තබා ගන්නට වුවමනා ප්‍රධානම කාරණය නම්, අප මේ සඳහන් කරන්නට යෙදුණේ ආකෘතික ගමන් සැළස්මක් පමණයි. ඔබගේ පුහුණුව, අත්දැකීම් මට්ටම, සෞඛ්‍යය මට්ටම, වැය කළ හැකි දින ගණන, හා වැය කළ හැකි මුදල ආදී තවත් බොහොමයක් දේ මත මේ ගමන් විස්තරය වෙනස් වෙනවා වගේම වෙනස් කළ යුතු වෙනවා. මේ නිසා හැම විටම, මේ සඳහා වෘත්තීමය වශයෙන් මෙවන් ගවේෂණයන් සංවිධානය කරන ආයතන හරහා නිසි උපදෙස් ලබා ගැනීම සිඳු කරන්න.

අපේ මීළඟ ලිපියෙන් එවරස්ට් මූලික කඳවුර තරණය සඳහා අවශ්‍යය වන ආම්පන්න ලැයිස්තුවත් සමඟින් හමු වෙමු.

ස්තූතියි.

Scan Alpine කණ්ඩායම

 

දත්ත: විකිපීඩියා වෙබ් අඩවියෙන්

 

·         ඡායාරූප අංක 01:  ෂර්පා ගම්මානයක් (ඡායාරූපය: ආනන්ද විද්‍යාලයීය 2007 එවරස්ට් මූලික කඳවුර ගවේෂණය)

·         ඡායාරූප අංක 02: ලුක්ලා ගුවන් තොටුපළ හා අභ්‍යන්තර ගුවන් ගමන් යානයක් (Domestic flight) (ඡායාරූපය: ආනන්ද විද්‍යාලයීය 2007 එවරස්ට් මූලික කඳවුර ගවේෂණය)

·         ඡායාරූප අංක 03: ගමන් මාර්ගයේ නවාතැන් පළක් (Tea house)(ඡායාරූපය: ආනන්ද විද්‍යාලයීය 2007 එවරස්ට් මූලික කඳවුර ගවේෂණය)

·         ඡායාරූප අංක 04: Tengboche ආරාමය ඉදිරිපස (ඡායාරූපය: ආනන්ද විද්‍යාලයීය 2007 එවරස්ට් මූලික කඳවුර ගවේෂණය)

·         ඡායාරූප අංක 05: එවරස්ට් මූලික කඳවුර (ඡායාරූපය: ඇවිදින්නෝ 2016 එවරස්ට් මූලික කඳවුර ගවේෂණය)

·         ‍ ඡායාරූප අංක 05: එවරස්ට් මූලික කඳවුර සිතියමක් (ඡායාරූපය: අන්තර්ජාලයෙන් )

එවරස්ට් මූලික කඳවුර තරණය ගැන බහුලවම විමසන ප්‍රශ්න (FAQ)

  සුබ දවසක්!   Scan Alpine අපි අද කතා කරන්න බලාපොරොත්තු වන්නේ එවරස්ට් මූලික කඳවුර තරණය සඳහා යොමු වන ක්‍රීඩකයන් විසින් බහුලව ම විමසන ප්‍රශ...