සෝලෝ හයිකින් වාසි සහ ධනාත්මක පසුබිම

 සුබ දවසක් හැම දෙනාටම!!!

හොඳයි Scan Alpine පසුගිය සතියේ ලිපියෙන් අප කතා කළා අපි සෝලෝ හයිකින්ග් කියන කඳු නැඟීමේ එක්තර ප්‍රබේධයක් පිළිබඳව කතා කරන්නර ආරම්භයක් ගත්තා. පසුගිය සතියෙන් අපි කතා කළේ සෝලෝ හයිකින්ග් වල දී තිබෙන අවාසි සහ අනතුරු පිළිබඳව.

ඉතිං අද අපි කතා කරන්නට බලාපොරොත්තු වන්නේ සෝලෝ හයිකින්ග් නම් ප්‍රබේධයේ තිබෙන වාසි සහ ධනාත්මක පසුබිම පිළිබඳව යි.

දෙවන කොටස - සෝලෝ හයිකින්ග් වාසි සහ ධනාත්මක පසුබිම

ඕනෑම දෙයක නරක පැත්තක් තිබෙනවා වාගේම හොඳ පැත්තකුත් ස්වභාවිකව ම පවතිනවා.

අප පසු ගිය සතියේ දී කතා කළ අනතුරු සහ අවාසි මෙන් ම සෝලෝ හයිකින්ග් මඟින් ක්‍රීඩකයෙකුට ලැබිය හැකි වාසි සහ ධනාත්මක පසුබිමකුත් තිබෙනවා.

නමුත් තරයේ මතක  තබා ගතයුතු කාරණය නම්, මේ සියළු දේ රදා පවතින්නේ මේ අභ්‍යාසයේ යෙදෙන පුද්ගලයාගේ පුහුණුව, විනය, පෙර සූදානම සහ දෙයක් නිසි ලෙසින් තේරුම් ගැනීමේ ශක්තිය සහ තවත් බොහොමයක් කාරණා අනුව බවයි. නිසි ලෙසින් දියත් නොකරන ලද සෝලෝ හයික් එකකින් ඔබත් අනතුරට ලක් වී ඔබ ව ගළවා ගැනීමට පැමිණෙන කණ්ඩායම් පවා අනතුරුදායක තත්වයකට පත් වෙන්නට පුළුවන්.

හොඳයි මොනවද අපි මේ කතා කරන වාසි

තමා අතට තම අතමය සෙවනැල්ල

Solo Trekking in Nepal Complete Guide in 2019 

කඳු තරණයට තියෙන ඇල්ම එහෙමත් නැත්නම් "ගාය" හැමෝටම නෑ. එහෙම ගායක් තියෙන යාළුවෙක් හොයා ගන්න තියෙන අපහසුව කන්දක් නඟින්න යන්න කතා කරලා බෑ කියපු යාළුවෝ ගානයි, එන්නම් කියලා අන්තිම මොහොතේ මඟ ඇරිය යාළුවෝ ප්‍රමාණයයි ඇත්තටම  කන්ද නඟින්න යන්න ආව ප්‍රමාණයයි ගත්තම අහසට පොළොව වගේ ලොකු වෙනසක් තියෙනවා. ඇත්ත නේද!

ඉතිං ඔබත් සෝලෝ හයිකින්ග් වලට යොමු වූ අයෙක් නම්, තවත් පිරිසකගේ කාල සටහන් මත යැපීමකින් තොරව ඔබට කැමති දිනයක නිසි ලෙසින් ඔබේ කඳු තරණය කරන්නට පුළුවන්.

තමන් කැමති තැනක් තෝරා ගැනීමේ හැකියාව

This American Girl Sri Lanka - This American Girl

කණ්ඩායමක් සමඟ කඳු තරණයක් සැළසුම් කිරීමේ දී සියළු දෙනාටම පහසු දිනයක් තෝරා ගැනීමේ දී වගේම සියළු දෙනාගේ ම කැමැත්ත ඇති කන්දක් තෝරා ගැනීමට, කණ්ඩායමේ සියළු දෙනාගේ ම හැකියාවන් ට ගැළපෙන කන්දක් තෝරා ගැනීමත් බොහෝ විට දින ගණනක් ගතවෙන වැඩක්. ඒ වගේම තමයි ගමනාගමනය වෙනුවෙන් පොදු ප්‍රවාහනය යොදා ගන්නවා ද, වෑන් රථයක් කුළියට ගන්නවා ද ආදී කාරණා ද බොහොමයක් දුරට වේලාව ගත වෙන කටයුතු.

 

ඉතිං තනිව කඳු තරණයේ දී මේ කී නොකී සියළු කාරණාවල සම්පූර්ණ තීරණය ගැනීමේ හැකියාව ඔබ සතු වෙනවා. නමුත් ඔබේ ගමනේ සැලසුම් පිළිබඳව ඔබේ මිතුරෙකු දැණුවත් කර තිබීම ඉතාමත් වැදගත් වන බවත් අමතක කරන්නට එපා.

ඔබේ දැනුම වර්ධනය වීම

තනිව කඳු තරණයේ දී ඔබේ සහායට කිසිවෙකුත් ඔබ අසල  නැහැ. ඔබ දැනටමත් ඒ පිළිබඳව හොඳ අවබෝධයක් ලබාගෙන තිබෙනවා සෝලෝ හයිකින්ග් වල ඇති අවාසි පිළිබඳව කතා කළ අපේ පෙර ලිපියෙන්. නමුත් කඳු තරණයක දී එහි සාර්ථක බව වෙනුවෙන් විවිධාකාර කුසලතා සහ දැනුම් සම්භාරයක් දායක වෙනවා. ඔබ කණ්ඩායමක් සමඟ නම්, කුසලතා රැසකින් යුතු පිරිසක් එකතු වීමෙන් මේ අරමුණ සාර්ථක වෙනවා. නමුත් තනිව කඳු තරණයේ දී ඔබ විසින් මේ සියළු කුසලතාවයන් ප්‍රගුණ කළ යුතු වෙනවා. එසේ නොකිරීමෙන් සම්පූර්ණ කඳු තරණය අසාර්ථක එකක් වන්නට පුළුවන් වගේම සම්පූර්ණයෙන් ම අනාරක්ෂිත එකක් වන්නටත් පුළුවන්.

ඔබේ වේගය - ඔබේ පහසුව - ඔබේ තීරණ       

 

කඳු තරණය කරන බොහොමයක් දෙනා කරන චෝදනාවක් තමයි "අපෝ අරයා යනවා වේගය වැඩී" එහෙමත් නැත්නම් "එයා කඳු නඟිනවා නෙමෙයි බඩ ගානවා" කියන කාරණා.

ස්වභාව ධර්මයත් සමඟ ගැඹුරින් එක්කාසු වෙන කඳු තරණ ක්‍රීඩකයන් තමන්ට වගේම අනෙක් සියළු දෙනාටමත් ගෞරව කරන්නටත්, එකිනෙකාගේ අඩු පාඩු හා නොහැකියාවන් පිළිබඳව මැදහත් සිතින් සිතන්නටත්, ඉවසන්නටත් පුරුදු විය යුතුයි.

නමුත් ප්‍රායෝගිකව, කණ්ඩායමක් ලෙසින් කඳු තරණයේ දී එකිනෙකාගේ වේගයන් එකිනෙකට වෙනස්.

ඔබ විසින් කළ යුතු වන්නේ කණ්ඩායමේ වේගයෙන් අඩුම ක්‍රීඩකයාගේ වේගයට සරිලන සාමාන්‍යය වේගයක් සම්පූර්ණ ගමනේ දී ම පවත්වා ගැනීමයි. නමුත් අඩු වේගයකින් ගමන් කරන අයෙකුට, වැඩි වේගයකින් ගමන් කිරීමේ දී වෙහෙස දැනෙනවා මෙන්ම, වේගතව්ත් ක්‍රීඩකයන් ට මෙසේ අඩු වේගයකින් ගමන් කිරීමේ දී වෙහෙස දැනෙනවා වැඩි බව ඇත්ත.

ඉතිං මේ සඳහා හොඳ විසඳුමක් තමයි තනිව කඳු තරණය. ඔබට නිදහසේ ඔබේ වේගයෙන් ගමන් කිරීමටත්, සුදුසු පරිදි අවශ්‍යය ස්ථානයන් හී දී විවේක ගැනීමටත්, ඔබ කැමැති ආරක්ෂිත තැනක කඳවුරු බැඳීමටත් හැකියාව පවතිනවා.

කණ්ඩායමක් ලෙසින් තීරණ ගැනීමේ දී කිහිප දෙනෙක්ගේ අදහස් ඒ සඳහා දායක වන බැවින් ඒ තීරණයන් වැරදී යෑමේ සම්භාවිතාවය සාපේක්ෂව අඩු බවත් අමතක නොකළ යුතුයි.

 ආත්ම ශක්තිය වර්ධනය

A 40+ solo hiker - Ioanna (A Woman Afoot)

කඳු තරණය ආත්ම ශක්තිය වර්ධනය කිරීම උදෙසා මහඟු ක්‍රීඩාවක්. අසීරුවෙන් කඳු මුදුනක් කරා ළඟා වීමෙන් පසු ඔබට දැනෙන තෘප්තිය සහා ඔබේ හැකියාවන්, දරා ගැනීම් පිළිබඳව ඇතිවෙන අභිමානය සහ විශ්වාසය අති මහත්. ඇතැම් විට ඔබට මේ සඳහා ඔබේ සඟයන් ඔබ දිරිමත් කරන්නට ඇති, නැත්නම් ඔබේ බැක් පැක් එක මඳ දුරක් ඔබ වෙනුවෙන් ඔසවා ගෙන යන්නට ඇති. නමුත් අවසානයේ දී ඔබ ඔබේ අරමුණ කරා ළඟා වුණා.

 සෝලෝ හයිකින්ග් එකක දී මේ ලැබෙන ආත්ම විශ්වාසය ඊටත් ඉහළ අගයක් වෙනවා. මොකද ඔබේ ඉලක්කය කරා යන්නට ඔබට ඉන්නේ ඔබම පමණයි. ඉතිං සාර්ථක කඳු තරණයක් අවශානයේ දී ඔබ ඇත්තටම ලබා ගෙන තිබෙන්නේ විශාල ජයග්‍රහණයක්.

වටපිටාව රස විඳින්න

Ditch your friends and try solo camping - Britany Robinson

අපි කඳු නඟින්න යන්නේ ඇයි? ඇඟ මහන්සි කරන්න විතරද? කන්ද මුඳුනට ගිය විට දැනෙන ආත්ම තෘප්තිය නිසා විතර ද? ඒ මේ සියළු දේ වගේම තමයි, අවට පරිසරයේ සුන්දරත්වය විඳීමත් අපේ එක අරමුණක්. ඡායාරූප ශිල්පීන්, ගස්, වැල්, මල් ගැන ආසා සහ ඒ ගැන සොයන්නන්, සතුන් කුරුල්ලන් ගැන හදාරන්නන් ආදී විවිධාකාර පුද්ගලයන් කඳු තරණයන් සඳහා එකතු වෙනවා.

ඉතිං කණ්ඩායමක් වශයෙන්, විශේෂයෙන් එකම විෂය සම්බන්ධයෙන් කැමැත්තක් නැති පුද්ගලයන්ගේ එකතුවකින් සැඳුණු කණ්ඩාමක දී එකිනෙකාගේ අවශ්‍යතාවය වෙනුවෙන් නැවතී සිටීමට තවත් අයෙක් දක්වන්නේ අඩු කැමැත්තක්.

නමුත් තනිව කඳු තරණයේ දී තමන්ගේ වේගයට කඳු නැඟීම කරන අතරම, තමන් ඡායාරූපයට නඟා නැඟීමට සෑහෙන කාලයක සිට ආසාවෙන් බලා සිටි පක්ෂියෙකුගේ ඉරියව්වන් හොඳින් හදාරමින්, තමන්ගේ සිතැඟි පරිද්දෙන් ඡායාරූපකරණයේ යෙඳීමට ඔබට අවස්ථාව ලැබෙනවා.

මීට අමතරව විශාල කණ්ඩායම් වශයෙන් කඳු තරණය කිරීමේ දී ඇතිවන ශබ්දය නිසා ඔබට කුරුල්ලන් සහ වන සතුන් නැරඹීමේ හැකියාවත් සාපේක්ෂව විශාල ලෙසින් නැති වී යන්නට පුළුවන්.

මානසික නිදහස

Solo camping : Pexels

වර්තමාන සමාජය සහ එහි ජීවත් වන අප සියලු දෙනාම වේගවත් තරඟයක හිර වෙමින් තමයි අපේ එදිනෙදා ජීවිතය ගත කරන්නේ. කඳු නඟින්නන් කඳු නැඟීම සඳහා පිටත් වීමට තවත් එක් හේතුවක් තමයි, මේ විඩාබර දින චර්යාවෙන් මිඳී හිත නිස්කලංක කර ගැනීමත්, ජීවිතයට මොහොතක ඉස්පාසුවක් ලබා ගන්නටත්.

ඉතිං තනිව කඳු නැඟීම තෝරා ගැනීමේ දී ඔබට මේ සොයන නිදහස සිත් සේ ලබා ගන්නට පුළුවන්.

වගකීමක් දැරීමට ඉගෙනීම

Risk, comfort and wild camping - Honey Woods Events

සෑම කණ්ඩායමක දීම සම්පූර්ණ කණ්ඩායම වෙනුවෙන් සියළු බර දරා ගනිමින්, ගමන සැළසුම් කිරීමේ සිට සියළුම පහසුකම් සූදානම් කිරීම හා කණ්ඩායම ආරක්ෂිතව නැවත සිය නිවෙස් වෙත රැගෙන ඒම දක්වා බර කරට ගන්නා සාමාජිකයෙක් දෙන්නෙක් සිටිනවා. එවන් බොහොයමක් අවස්ථාවල දී අනෙක් සාමාජිකයන් විසින් වගකීම් විරහිතව හැසිරෙන්නේ තම සඟයා පිළිබඳව විශ්වාසය තබමින්.

නමුත් තනිව කඳු තරණයේ දී ඒ මේ සියළු දෙය පිළිබඳව වගකීම දරමින්, සියළු දෙයම සූදානම් කර ගනිමින්, ආරකෂිතව කඳු තරණය කිරීමේ වගකීම දරන්නට සිඳු වන්නේ කඳු තරණ ක්‍රීඩකයාටමයි.

පරිසරයට සිඳු වන හානිය අවම වීම

Dos and don'ts of camping - The Morning LK

විශාල කණ්ඩායමක් ලෙසින් වනාන්තර වලට ඇතුල්වීමේ තවත් ගැටළුවක් තමයි, එමඟින් පරිසරයට සිඳුවන හානිය. කණ්ඩායම් නායකයා, සේවා සපයන්නා හෝ මඟ පෙන්වන්න්නා කොතරම් උපදෙස් ලබා දුන්නත්,  කණ්ඩායමේ අනික් සාමාජිකයන් එම උපදෙස් කොතරම් දුරකට පිළිපඳිමින් පරිසරයට වන හානිය අවම කිරීමට ත්, පරිසරය ආරක්ෂා කිරීමටත් කටයුතු කරන්නේ ද යන්න විවාදාත්මකයි.

කණ්ඩායමක් වනාන්තරයක ගමන් කිරීමේ දී ගමන් මාර්ගය තව දුරටත් පළල් වීම, ශබ්ද දූෂණය, පොලිතින්, ප්ලාස්ටික් ආදී කසළ පරිසරයට මුද හැරීම ආදී ගැටළු ඇති විය හැකියි.

නමුත් තනිව කඳු තරණයේ දී මෙසේ පරිසර පද්ධතියකට සිඳු විය හැකි හානිය ඉතාමත් අවම වේ.

ඉතිං අදට මේ ලිපිය අවසන් කරන්නයි මේ සූදානම.

සෝලෝ හයිකින්ග් කිරීම හෝ නොකිරීම ස්ව කැමැත්තෙන් සිඳු කළ යුතු දෙයක් වගේම, මේ ලිපිය කිසිම ආකාරයකින් සෝලෝ හයිකින්ග් ජනප්‍රිය කිරීම හෝ ප්‍රචලිත කිරීම අරඹයා ලියන ලද්දක් නොවන බවත්, සෝලෝ හයිකින්ග් කිරීම හෝ හයිකින්ග් කිරීම මඟින් සිඳුවිය හැකි අනතුරු සම්බන්ධයෙන් මේ ලියන්නා හෝ ඔහු පෙනී සිටින සමානගම හෝ වග නොකියන බවත් අවසානයට ලියා තැබිය යුතු වෙනවා. මොකද සෑම දෙයක් ම රදා පවතින්නේ ඒ භාවිතා කරන්නා කෙතරම් දුරට නිසි  ආරක්ෂිත ක්‍රියා මාර්ග අනුගමනය කරමින්, ක්‍රීඩාවේ නියැළෙනවා ද යන්න මතයි.

ඉතිං නැවතත්, සෝලෝ හයිකින්ග් ලෝකයේ බොහොම ජනප්‍රිය කඳු නැඟීමේ ප්‍රබේධයක් බව ඇත්ත. නමුත් විදේශ රටවල කඳු තරණය සහ සමස්තයක් ලෙසින්, සියළු ත්‍රාසජනක ක්‍රීඩාවන්ට ලබා දී ඇති අනුග්‍රහයන් අල්ප බවත් සහ හදිසි අවස්ථාවක දී ගළවා ගැනීමේ මෙහෙයුම් දියත් කිරීමට ඇති පහසුම් අවම බවත් මතක තබා ගන්න.

සෝලෝ හයික් එකක් සැළසුම් කිරීමේ දී ඔබ විසින් සැළකිළිමත් විය යුතු කරුණු පිළිබඳව ලබන සතියේ ලිපියෙන් අපි කතා කරමු.

සටහන: නදීශ දිලුම් දිසානායක

Scan Alpine කණ්ඩායම

 

තනිව වන ගත වීම (පළමු කොටස)

 

හොඳයි Scan Alpine පසුගිය සතියේ ලිපියෙන් අප කතා කළා කඳු තරණය සඳහා සුදුසු ආම්පන්න ලැයිස්තුවක් තෝරා ගැනීමේ දී සැළකිලිමත් විය යුතු කරුණු ගැන. ඒ වගේම අප පොරොන්දු වුණා, ඉදිරි ලිපි මඟින් ඒ ඒ අයිතමයන් තෝරා ගැනීමේ දී විශේෂයෙන් සොයා බැලිය යුතු සහ සැළකිලිමත් විය යුතු දේ පිළිබඳව කතා කරන්නට.

ඒ පොරොන්දු ව අපට අමතක නැහැ.

නමුත් අද අපි කතා කරන්නට බලාපොරොත්තු වන්නේ, මේ දිනවල සමාජයේ බොහොම ප්‍රචලිත මාතෘකාවක් සම්බන්ධවයි.

පසුගිය සති කිහිපය තුළ කඳු තරණය සඳහා සහභාගී වූ කණ්ඩායම් කිහිපයක, සාමාජිකයන් කිහිප දෙනෙකුම, තම කණ්ඩායමෙන් වෙන් ව මඟ වැරදීමෙන් පසුව හමුදා සහ පොලිස් පිරිස් මඟින් සංවිධානය කරන ලද ගළවා ගැනීමේ මෙහෙයුම් මඟින් මහත් පරිශ්‍රමයක් දරා සොයා ගත් ආකාරය දකින්නට ලැබුණා. ඒ අතරම ඉතාමත් අවාසනාවන්ත ලෙසින් එක් තරුණයෙකු ප්‍රපාතයකින් ඇඳ වැටී මිය ගොස් තිබුණා. පසු ගිය කාලයේ දකින්නට ලැබුණු අධික මීදුම් තත්වය, දැඩි වර්ෂාපතනය බොහෝ විටින් මේ සිඳු වීම් වලට හේතුව වෙන්නට ඇති. නමුත් අකාලයේ රටට අහිමි වූ තරුණ ජීවිතය නැවතත් ලබා ගන්නට හැකි වෙන්නේ නෑ.

Body of tv staffer recovered from the forest in madulsima - Lankasara Editor English

හොඳයි මේ සියළු කතා බහත් සමඟම සමාජයේ සහ කඳු තරණයට ආදරය කරන ප්‍රජාව අතර ගොඩ නැඟුණ සංවාදයන් අතරින් ප්‍රධාන මාතෘකාවක් තමයි සෝලෝ හයිකින් (Solo Hiking) නැත්නම් තනිව ම කඳු නැඟීම, වන ගත වීමට වර්තමානයේ තරුණ පිරිස් අතර ඇති වී තිබෙන ප්‍රවණතාවය සහ කැමැත්ත.

ශ්‍රී ලංකාව තුළ සාපේක්ෂව අලුත් මාතෘකාවක් වුවත් ලෝකයේ බොහොමයක් රටවල පුද්ගලයන් විනෝදයට හෝ ක්‍රීඩාවක් ලෙසින් කඳු තරණය කිරීමේ දී මේ විකල්පය තෝරා ගන්නවා දකින්නට පුළුවන්. සෝලෝ හයිකින්ග් සඳහා යොමු වීම සඳහා කැමැත්ත සහ හේතුව පුද්ගලයාගෙන් පුද්ගලයාට වෙනස්. ඒ කුමන හේතුවක් නිසාවෙන් සෝලෝ හයිකින් කියන විකල්පය තෝරා ගනු ලැබුවත්, සෝලෝ හයිකින්ග් කිරීම මඟින් අයෙකුට ලබා ගත හැකි වාසි පිළිබඳව වෙනත් ලිපියකින් කතා කරන්නර අප බලාපොරොත්තු වෙනවා. ඒ සමඟම වෙනත් ලිපියකින් සෝලෝ හයිකින්ග් සඳහා යොමු වූවෙකුට උදව් විය හැකි තොරතුරු ගැන කතා කරන්නට ත් අප බලාපොරොත්තු වෙනවා.

අද ලිපියෙන් අප කතා කරන්නට බලාපොරොත්තු වන්නේ මේ මාතෘකාව සම්බන්ධයෙන් ආරම්භයක් සහ සෝලෝ හයිකින්ග් කිරීමේ අවාසි සහ සෘණාත්මක කෝණය පිළිබඳවයි.

Solo hiking 1400km through Sweden — A Girls' Guide to Travelling Alone

Solo hiking, කියන ඉංග්‍රීසි වචනයෙන් පැහැදිලිව ම ප්‍රකාශ වන පරිද්දෙන් ම සෝලෝ හයිකින්ග් කියන්නේ තනිවම කඳු තරණය කිරීමයි. සාමාන්‍යයෙන් කණ්ඩායමක් හෝ අවම දෙදෙනෙකු ලෙසින් සිඳු කරනු ලබන කඳු තරණයක් තනිව ම සිඳු කිරීම ලෙසින් සරලව ම සෝලෝ හයිකින්ග් කියන වචනයේ තේරුම ලෙසින් හඳුන්වන්නට පුළුවන්.

ඔබ හොඳින් දන්නා ප්‍රදේශයක පැය කිහිපයක කඳු තරණයක සිට ඔබට ආධුනික ප්‍රදේශයක දින හෝ සති ගණනක් ගතවෙන කඳු තරණයක් දක්වා පුළුල් පරාසයක සෝලෝ හයිකින්ග් දිව යන්නට පුළුවන්.

තනිව කඳු තරණයේ අවාසි සහ සිඳුවිය හැකි අපහසුතා

හදිසි අනතුරක් සිඳු වූ අවස්ථාවක දී

සෑම කඳු තරණයක දී ම ඔබ තනිව හෝ කණ්ඩායමක් වශයෙන් සිටියත් ඔබ එක්තරා ප්‍රමාණයකින් අනතුරු සහිත වටපිටාවකට නිරාවරණය වී සිටිනවා. කණ්ඩායමක් වශයෙන් සිටීමේ දී යම් කිසි හදිසි අවස්ථාවක දී ඔබේ සහායට තවත් පිරිසක් සිටීවී. නමුත් සෝලෝ හයිකින්ග් හී දී හොඳ නරක සියළුම අවස්ථාවන් ට මුහුණ දීමට සිඳු වන්නේ තනිවමයි.

Cowboy camping with Mt Shasta background - Actionpackedtravel.com

මේ අනතුරු නාය යෑම් වැනි ස්වභාවික ව්‍යසනයක් ලෙසින්, මී මැස්සන්, බඹරුන්, වලසුන් වැනි වන සතුන්ගේ මාර්ගයෙන් හෝ පය ලිස්සා වැටීමෙන් පාදයක අස්ථියක් බිඳීමක් ආදී විවිධ ලෙසින් සිඳු වෙන්නට පුළුවන්.

ඒ වගේම තමයි ඔබ ඉතාමත් හොඳ ප්‍රථමාධාරකරුවෙකු විය හැකියි. නමුත් හදිසි අනතුරක දී ඔබ සිහි නැතිවීමකට ලක් වුව හොත් ඔබට උපකාර කිරීමට කිසිවෙකු අසළ නොසිටින්නට පුළුවන්.

හමුදා මෙහෙයුම් වලදී කුඩා කණ්ඩායම් සංයුතිය ලෙසින් 04, 06, 08 ලෙසින් පැවතීමට මෙයත් එක් හේතුවක්. එක් සාමාජිකයේ තුවාල ලද මොහොතක, එක් අයෙකු ඔහු සමඟ ඔහුගේ ආරක්ෂාවට සහ සාත්තුවට සිටිමින් අනෙක් දෙදෙනාට උපකාර සොයා පිටත් වෙන්නට පුළුවන්.

අතරමං වීම

ඉතාමත් පහසු කඳු තරණයක දී වුවත් සුළු මොහොතක ට හෝ මඟ වැරදීම විය හැකි දෙයක්. මෙවන් අවස්ථාවක දී තවත් සඟයෙක් සිටීම ඉතාමත් වාසිදායක වේවි.

 මඟ වැරදීමක් සිඳු වූ  මොහොතක දී කලබල වීම සාමාන්‍යය දෙයක්. ඉතිං එවන් අවස්ථාවක දී ඔබත් සමඟ සඟයෙක් සිටී නම් ඔබ දෙදෙනාට එකිනෙකාගේ කැළඹීම නවත්න්නට පුළුවන්. අනෙක් අතට දෙදෙනෙකු සිටින මොහොතක දී මඟ වැරදීමේ ප්‍රවණාතවයත් අවම වන්නේ, ඔබ වැරදි මඟක් තෝරා ගන්නා මොහොතක ඔබේ සඟයා විසින් එය අවබෝධ කර ගන්නට පුළුවන් නිසයි.

Know what the trail will entail - A guide to solo hiking by Elisha 

අත්‍යාවශ්‍යය උපකරණ හා ද්‍රව්‍යය

 ඔබට සම්පූර්ණ ගවේෂණය සඳහා වුවමනා සියළු දේ ඔබ සමඟ උසුලා ගෙන යෑමට ඔබට සිඳු වේවි. කණ්ඩායමක් සමඟ ගවේෂණය කිරීමේ දී ඒ ඒ කණ්ඩායම් සාමාජිකයන් අතර යම්කිසි බර උපකරණ ප්‍රමාණයක් බෙදා දීමේ හැකියාව පවතිනවා. මෙහි ඇති අනෙක් අනතුරුදායක් බව නම්, උවමනා කරන සියළු දෙය අධික බර නිසා ඔසවා ගෙන යෑමට නොහැකි අවස්ථාවක දී ඔබ විසින් ඒ ඇතැම් දේ රැගෙන නොයෑමට තීරණය කළ හැක. ඉතිං හදිසි අවස්ථාවක දී මේ නිසා ඔබ ඉතාමත් අපහසුතාවයට පත් වෙන්නට පුළුවන්.

 

Know Your Gear & What to Pack - A Woman A foot by Ioanna

 නිසි සූදානමකින් තොර වීම

මේ මාතෘකාව උපකරණ වශයෙන්, කායික වශයෙන් වගේම මානසික වශයෙනුත් බලපානා කාරණාවක්.

කඳු තරණයක් නිසි ලෙසින් ආරක්ෂාකාරීව කිරීම සඳහා විවිධාකාර විෂයන් යටතේ මනා පුහුණුවක් තිබීම අත්‍යාවශ්‍යයයි. උදාහරණ වශයෙන් සිතියම් කියවීම, ගැට වර්ග ගැන අවබෝධය, කෑම පිසීම ආදී කුසලතා දැකිවිය හැකියි. කණ්ඩායමක් සමඟ සිටීමේ දී මේ ඒ ඒ කුසලතා සඳහා දක්ෂයන් ඔබට කණ්ඩායමේ සංයුතියට එකතු කර ගත හැක. නමුත් ඔබ තනිව සිටීමේ දී කොතරම් දුරට ඒ ඒ ගවේෂණය සඳහා වුවමනා කරන කුසලතා සහ පුහුණුව ඔබට තිබේ ද යන්න කල්පනා කර බැලිය යුක්තක්.

S : Stop, T : Think, O : Observe,P :  Plan - A Solo Hiking Adventure By Peter & Felice

ඒ වගේම තමයි, තනිව කඳු තරණය කිරීමේ දී හෝ කඳවුරු ගත වීමේ දී ඇතැම් විට ඔබට දැඩි පාළුවක් හෝ තනිකමක් ඇති වෙන්නටත් පුළුවන්. තනිවම හුදකලාව කිසිවෙකුත් සමඟ කතා බහ කිරීමකින් තොරව සිටීම ට හුරු නොවූ කෙනෙකුට මේ දැනෙන හුදකලාව දරා ගන්නට අපහසු වේවි.කණ්ඩායමක් සමඟ සිටීමේ දී ඔබේ කණ්ඩායමේ සාමාජිකයන්ගේ හිතවත් වචනයක උණුසුම ඔබට ඉතාමත් හොඳ අස්වැසිල්ලක් වේවි. මීට අමතරව අසීරු අවස්ථාවක ඔබව දිරිමත් කිරීමට හා උපකාර කිරීමට විශ්වාසවන්ත සඟයෙක් සිටීම වාසියක් වේවී.

සොරකම්, පැහැර ගැනීම් සහ තර්ජන

කාන්තා පිරිමි බේදයකින් තොරව ඕනෑම අයෙකුට මේ ආකාරයේ අකරතැබ්බයන් ට මුහුණ දීමට සිඳු වීමට පුළුවන්. මෙහි දී ක්‍රීඩකයෙක් වශයෙන් ඔබත් පැහැදිලිව අවබෝධ කර ගත යුතු දේ නම්, ඔබ ඇතුළු වන්නේ ඔබට ආගන්තුක පරිසරයකට. ඒ ආශ්‍රිත සමාජයේ ආගමික, සාමාජීය කටයුතු සහ විශ්වාසයන්ට ගරු කරමින්, ඔවුන්ගේ එදිනෙදා ජීවිතයට බාධාවක් ඇති නොවෙන්නට කටයුතු කිරීමෙන් මෙවන් කරදර බොහොමයක් දුරට අවම කර ගන්නට පුළුවන්.

නමුත් ඔබ කොතරම් හොඳින් හැසිරුණත්, මිනිසුන් අතින් සිඳු විය හැකි හිරිහැර සම්පූර්ණයෙන් ම බැහැර කරන්නට හැකියාවක් නෑ. ඉතිං එවන් අවස්ථාවක දී ඔබ සමඟ තවත් පිරිසක් සිටීමේ දී එසේ හිරිහැර කරන්නට ඉදිරිපත් වන්නා ද දෙවරක් සිතා බලාවි.

First off, don’t ever disclose that you’re alone - A Jaunt with Joy by Joy

හොඳයි ලිපිය ආරම්භයේ දී අපි සඳහන් කළා සෝලෝ හයිකින්ග් ලෝකයේ බොහොමයක් රටවල බොහොම ප්‍රසිද්ධ විකල්පයක් කියලා. එහෙනම් ඇයි ලංකාව තුළ මේ වන විටත් මේ විකල්පය එතරම් ම ජනප්‍රිය නැත්තේ කියන කාරණයට සහ දිගු කාලයක් කඳු තරණයේ නියැළුණු ක්‍රීඩකයන් ලෙසින් මේ විකල්පය තරුණ, ආධුනික ක්‍රීඩකයන් ට අප යෝජනා නොකරන්නේ කියන කාරණයට දිය හැකි පැහැදිලිම සහ සරල ම උත්තරය තමයි, අප රටක් විදිහට ත්‍රාසජනක ක්‍රීඩා සහ ඒ හා ආශ්‍රිත ක්‍රියාකාරකම්, ඒ හා ආශ්‍රිත අනෙකුත් සේවා සැපයීම් සහ රාජ්‍යය අනුග්‍රහය අතින් ගත් කළ අප තවමත් ඉන්නේ බොහොමයක් පසු පසින්.

Emergency contact: World Health Organization Sri Lanka

හදිසි අවස්ථාවක දී ඔබේ සහායට ක්ෂණිකව පිටත් කර යැවිය හැකි කඳුකර පරිසර පද්ධතීන් වල ගළවා ගැනීමේ මෙහෙයුම් කිරීම සහ ප්‍රථමාධාර ලබා දීමට පුහුණුවලත් වෘත්තිකයන් සහ ඒ සඳහාම වෙන්වූ ආයතන සහ හෙලිකොප්ටර් යානා ශ්‍රී ලංකාවේ මෙතෙක් ක්‍රියාත්මක වන්නේ නැහැ.

ඕනෑම ව්‍යසනයක දී හෝ අනතුරක දී ඔබේ පිහිටට සිටින්නේ ශ්‍රී ලංකා පොලිසියේ සහා ත්‍රිවිධ හමුදා සාමාජිකයන් සහ අසල්වැසි ගම්වැසියන්. ඉතිං ඔවුන්ගේ එදිනෙදා අනෙකුත් රාජකාරීන් සහ ඔවුන් ස්ථානගත වී සිටින දුර ප්‍රමාණය අනුව ඔබ වෙත උපකාර පැමිණීමේ දී යම්කිසි පමාවක් ඇති වෙන්නට පුළුවන්.

 මේ වගේම තමයි, වෙනත් රටවලට සාපේක්ෂව, ශ්‍රී ලංකාව තුළ තවමත් ත්‍රාසජනක ක්‍රීඩා සඳහා විශේෂ වූ රක්ෂණ ආවරණයන් හී හිඟයක් පවතින ලෙසක් දකින්නට පුළුවන්. ඉතිං හදිසි අනතුරක දී හොඳ ශක්තිමත් රක්ෂණ සමාගමක හොඳ රක්ෂණ ආවරණයක් නොමැතිව ඔබගේ අනාගතය සම්පූර්ණයන් ම අඳුරු වන්නට ත් පුළුවන්.

 අනෙක් කරුණ තමයි, නිසි පුහුණුවකින් හා අවබෝධයකින් තොරව රැල්ලට යමින් ඔබ කරන්නට සූදානම් වන ගවේෂණය ඔබව ගළවා ගැනීමට හෝ ඔබට උපකාර කිරීමට පැමිණෙන අයවලුන්ගේ ජීවිතත් අනතුරකර දැමීමක් විය හැඛි බව තරයේ සිහි තබා ගන්න.

 

Courtesy photo - CHRIS TOWNSEND

ඉතිං අදට මේ ලිපිය අවසන් කරන්නයි මේ සූදානම.

ඉතිං අප විශ්වාස කරනවා අපේ මෙවර ලිපියත් සමඟ, බොහෝ දෙනා කතා කරන සෝලෝ හයිකින්ග් ගැන සහ ඒ හා බැඳි අවාසි සහ අනතුරු ගැන ඔබට හොඳ අවබෝධයක් ලැබෙන්නට ඇති කියලා. ඉතිං ඒ අවබෝධයත් එක්කම අපි ලබන සතියේ ලිපියෙන් හමුවෙමු සෝලෝ හයිකින්ග් වල තිබෙන වාසි සහ ධනාත්මක පසුබිම පිළිබඳව.

සටහන: නදීශ දිලුම් දිසානායක

Scan Alpine කණ්ඩායම